२०७८ साउन ३२ गते
अफगानिस्तानको राजधानी काबुलमा रहेको अन्तर्राष्ट्रिय विमानस्थल अमेरिकी सेनाले आफ्नो नियन्त्रणमा लिएका छन्।
तालिबान काबुलमा आएसँगै त्यहाँबाट बाहिरिन चाहेका नागरिकको भिडभाड रहेका बेला अमेरिकी सैनिकले काबुलमा रहेको हामिद कारजाइ अन्तर्राष्ट्रिय विमानस्थल नियन्त्रणमा लिएका हुन्।
अमेरिकी सैनिकले काबुलको एअर ट्राफिक कन्ट्रोल आफ्नो नियन्त्रणमा लिएको छ। उसले आफ्ना नागरिक तथा कर्मचारीहरु तथा सहयोगी देशका कर्मचारी तथा नागरिकको उद्धारलाई प्राथमिकता दिएको छ।
अधिकांश व्यवसायिक उडानहरु रद्द भएका छन्। तालिबान बिद्रोहीहरु काबुल प्रवेश गरेसँगै बाहिरिन चाहने काबुलका बासिन्दाहरु विमानस्थल तर्फ गएको भिडभाडसहितका तस्बिर तथा भिडियो सार्वजनिक भएका छन्।
अमेरिकी सैनिकले सोमबार बिहान विमानस्थलमा अत्यधिक भिडभाड भएका कारण अवस्था नियन्त्रणमा लिनका लागि हवाई फायर गरिएको पनि जनाएको छ।
                                    

3 वर्ष पहिले