मंसिर ११ गते । पर्सा र बारामा भएका छुटाछुट्टै सवारी दुर्घटनामा परी दुई जनाको मृत्यु भएको छ भने एक जना घाइते भएका छन्।
वीरगञ्ज महानगरपालिका १४ नर्सिङ माविस्थित प्रदेश ०३–०२७ प ००९८ नम्बरको मोटरसाइकल अनियन्त्रित भएर दुर्घटना हुँदा चालकको मृत्यु भएको हो।
मृत्यु हुनेमा मोटरसाइकल चालक वीरगञ्ज महानगरपालिका–१२ मुर्ली बस्ने १९ वर्षीय साहिल हवारी रहेको पर्साका प्रहरी प्रवक्ता दिपक गिरीले जानकारी दिए। दुर्घटनामा परी मोटरसाइकलमा सवार सोही स्थानका २० वर्षीय सरताज अन्सारी घाइते भएका छन्। उनको अवस्था खतरामुक्त रहेको गिरीले बताए।
यस्तै, अटोको ठक्करबाट बाराको निजगढ नगरपालिका–१ नमुना बस्ती बस्ने ४० वर्षीया सानुमाया घिसिङको मृत्यु भएको छ। गत बिहीबार प्र।२–०३–००१ ह ४३३ नम्बरको अटोले ठक्कर दिँदा घिसिङ घाइते भएकी थिइन्। उनको उपचारको क्रममा आइतबार वीरगञ्जमा मृत्यु भएको बाराका प्रहरी प्रवक्ता राजेश थापाले जानकारी दिए।
ठक्कर दिने अटो र अटो चालक बारा निजगढ नगरपालिका–८ बस्ने लोकबहादुर आले मगरलाई नियन्त्रणमा लिइ थप अनुसन्धान भइरहेको थापाले बताए।