१४ पुस , २०७७
नेपाल कम्युनिस्ट पार्टी (नेकपा) को प्रचण्ड–नेपाल पक्षका केन्द्रीय सदस्य तथा पूर्वमन्त्री यदुवंश झाले प्रधानमन्त्री केपी शर्मा ओलीले पार्टी एकता विरोधी र संविधान विरोधी हरकत गरेका कारण देशमा अन्योलको अवस्था सिर्जना भएको आरोप लगाएका छन् ।
सो पार्टीले प्रधानमन्त्री ओलीका ‘असंवैधानिक कदमको विरोध’ भन्दै मंगलबार आयोजना गरेको देशब्यापी विरोध कार्यक्रम अन्तर्गत जनकपुरको विद्यापति चोकमा आयोजित सभालाई सम्बोधन गर्दै उनले प्रतिनिधिसभा विघटन गरेर प्रधानमन्त्री ओलीले संविधानलाई नै संकटमा पारेको आरोप लगाए ।
ओलीले संसद विघटन गरी देशमा अस्थिरता निम्त्याएको, पार्टी एकता विरोधी हरकत गरेको भन्दै उनले त्यस्ता कदमको विरुद्ध सडकमा उत्रिनुको विकल्प नरहेको बताए ।
यस्तै, जनकपुरमै राम चोकमा आयोजित सभालाई सम्बोधन गर्दै केन्द्रीय सदस्य श्रीप्रसाद साहले प्रतिनिधिसभा पुनर्स्थापना नभएसम्म आन्दोलन जारी रहने बताए । उनले प्रम ओलीले चालेको असंवैधानिक कदम नसच्याएसम्म आन्दोलन जारी रहने र त्यसका लागि तयार रहन कार्यकर्तालाई आह्वानसमेत गरे ।
यस्तै , नेकपा प्रचण्ड–माधव समूहका स्थायी समिति सदस्य गणेश साहले राष्ट्रपति विद्यादेवी भण्डारी र प्रधानमन्त्री केपी शर्मा ओली मिलेर गलत काम गरेको आरोप लगाएका छन् । मंगलबार जनकुपुरधाममा आयोजित विरोधसभालाई सम्बोधन गर्दैै नेता साहले श्रमजीवी वर्गले यस कदम नसच्चिएसम्म निरन्तर आन्दोलन गर्नुपर्ने बताए ।
उनले राजा महेन्द्रले कू गर्दा जनकुपुरवासीले बम पड्काएर जवाफ दिएको स्मरण गर्दै राष्ट्रपति भण्डारी र प्रधानमन्त्री ओलीलाई पनि जवाफ दिनुपर्ने चेतावनी दिए । उनले भने,‘ शाही कू गर्ने राजा महेन्द्र जनकपुर आउँदा यहाँका जनताले बम पड्काएर जवाफ दिए । अब विद्या र ओली आउँदा पनि कडा रुपमा विरोध प्रदर्शन गर्नुपर्छ । धनुषामा उनीहरुलाई निषेध गर्नुपर्छ ।’
                                    

3 वर्ष पहिले