‘जलेश्वरका आधि जनसंख्या एक प्रकारले घरभित्रको जेलामा बन्धक छ’ राजनीतिक विश्लेषक सिकेलाल भन्छन् ‘उहाँहरुलाई जेल मुक्त गर्नैपर्छ ।’ उनले यो प्रसंग बडो मार्मिक ढंगले जलेश्वरको एक कार्यक्रममा उठाए ।
भिजिट जलेश्वरले आयोजना गरेको ‘जलेश्वरको विगत, वर्तमान र भविष्य’ विषयक विचारगोष्ठीमा राजनीतिक विश्लेषक लालले जलेश्वरको आधि जनसंख्या अर्थात् महिला शक्ति घरमा बन्धक रहेको र उनीहरु बाहिर नआएसम्म जलेश्वरसहित मधेशको विकास असम्भव रहेको औंल्याए ।
‘नारी सुरक्षित र शक्तिशाली भए मात्रै समाजको विकास सम्भव छ’ उनी भन्छन् ।
‘दलालीवला शक्ति संरचनाको चपेटामा जलेश्वर छ । यहाँका मेयर र सांसदहरु सिडिओभन्दा कयौं गुणा पदमा माथि छन् । तर, विडम्बना उनीहरु सिडिओको पछाडि हात मोल्दै दगुर्छन् । दलाली तथा दासमनोवृतिलाई छोड्नु पर्छ । ’, लालले थपे ‘भिखमा विकास र अधिकार दुनियाँमा कँही पाइएको छैन र पाइँदैन पनि । आफैलाई बुलन्द बनाउनुपर्छ । संघर्षपछि शक्ति स्वतः प्राप्त हुन्छ । यसमा हामी विश्वास गरौं’
अर्को प्रसंगमा उनले धार्मिक र जातीय सामाजिक तथा सांस्कृतिक संरचनाको आदानप्रदानको कमीले जलेश्वर विकासमा फडको नमारेको उनले कारण औंल्याए ।
नेपाल भारतबीच रोटी–बेटी र रोजगारीको सम्बन्धबारे उनले चर्चा गर्दै भने ‘काठमाडौं र दिल्लीको सम्बन्ध बढेर मात्र हुँदैन । यहाँ जलेश्वर र सुरसण्डबीचको सम्बन्ध विस्तार गर्नु जरुरी छ ।’ देशभरका मधेस भूभागमा सीमा वारी र पारीका वस्ती–वस्ती बिच सीमाञ्चल, जनसम्पर्क बढाउन सामाजिक अभियन्ताहरु लाग्नुपर्ने उनले स्पष्ट पारे ।
 
                                    

2 वर्ष पहिले