२७ पुस ,२०७७
जनकपुरधाम उपमहानगरपालिकाले शहीद पत्रकार स्व.उमा सिंहको स्मृतिमा रु ५ लाखको अक्षय कोष स्थापना गरेको छ ।
आज सिंहको १२ औं स्मृति दिवसको अवसरमा उपमहानगरपालिकाले आयोजना गरेको कार्यक्रममा मेयर साहले अक्षय कोष सञ्चालनका लागि बैंकमा रकम जम्मा गर्नका लागि चेक काट्न काम भइसकेको जानकारी दिए । यो अक्षय कोषबाट उमा सिंहको नाममा उत्कृष्ट काम गर्ने पत्रकारलाई पत्रकारिता पुरस्कार प्रदान गर्ने उनले बताए ।
राष्ट्र, समाज, नगर, सामाजिक न्यायका लागि योगदान पु¥याउने पत्रकारको संख्या यकिन गरी उमा सिंह पत्रकारिता पुरस्कार प्रदान गरिने मेयर साहको भनाइ छ ।
पत्रकार सिंह प्रति श्रद्धासुमन अर्पण गर्दै मेयर साहले एक निडर पत्रकार गुमाएको प्रति दुःख व्यक्त गरेका छन् । उनले पत्रकार सिंहको विभत्स हत्या हुनु जनकपुरधामको लागि दुर्भाग्यपूर्ण रहेको बताए । कार्यक्रममा प्रमुख प्रशासकीय अधिकृत बिनोदकुमार खड्काले अक्षय कोषमा जम्मा गर्न लेखाका कर्मचारीलाई ५ लाखको चेक बुझाएका छन् ।
सिरहा घर भएकी स्व. सिंहको २०६५ साल पौष २७ गते जनकपुरको रजौलस्थित डेरामा विभत्स हत्या भएको थियो । उनी त्यसबेला जनकपुरको रेडियो टुडेमा कार्यरत थिइन् ।