२६ पुस, २०७७
महोत्तरीको क्रिकेट खेलाडी कुन्दन सिंहको निधन भएको छ ।
विगत लामो समयदेखि दुबै मृगौला फेल भई उपचाररत रहेका २४ वर्षीय सिंहको आइतबार निधन भएको हो ।
महोत्तरीको जलेश्वर नगरपालिका फुलहट्टा घर भएका कुन्दनको मृगौला फेर्नुपर्ने चिकित्सकले धेरै अगाडि नै सुझाव दिइसकेका थिए । तर, आर्थिक अभावका कारण उनले आफ्नो मृगौला फेर्न सकेका थिएनन् । उनलाई तत्काल डायलायशिसमा राखिएको थियो ।
राष्ट्रियस्तरको खेलमा प्रदेश २ को तर्फबाट दर्जनौं यु–१९ क्रिकेट प्रतियोगिता खेलिसकेका कुन्दनको आइतबार बिहान मृत्यु भएको जिल्ला क्रिकेट संघ धनुषाका उपसभापति शोभाकान्त पाण्डेले जानकारी दिए । उनका अनुसार कुन्दनको मिर्गौलाले विगत लामो समयदेखि काम गर्न छोडेको थियो ।
कुन्दनलाई सहयोग गर्न सरकारले चासो नदेखाएपछि जिल्ला क्रिकेट संघ धनुषाका उपाध्यक्ष शोभाकान्त पाण्डे अगुवाईमा जनकपुरमा ’कुन्दन बचाउ अभियान’ समेत चलाएर युवाहरुले करिब ७ लाख रुपैयाँ संकलन गरी कुन्दनको उपचारमा सहयोग पु¥याएका थिए । 
                                    

3 वर्ष पहिले